Ermənistan təhlükəsizlik şursının keçmiş katib David Şahnazaryan Qarabağla bağlı diqqətçəkən iddia irəli sürüb.

Yenixeber.org: Şahnazaryan Azərbaycanın Qarabağdakı erməni əhalisi ilə bağlı proqram hazırladığını iddia edir.

“Rəsmi Bakı Qarabağ və orada yaşayan erməni əhalisinin Azərbaycana tam inteqrasiyasını əhatə edən proqram hazırlayıb. Bu, “yol xəritəsidir”. Proqram 4 mərhələdən ibarətdir.

Birinci mərhələdə sənədlərin Azərbaycan pasportu ilə dəyişdirilməsi, yəni ermənilərin pasportlaşdırılması həyata keçiriləcək. İkinci mərhələdə Qarabağda Azərbaycan manatı dövriyyəyə buraxılacaq.
Növbəti mərhələdə Qarabağdakı silahlılar tamamilə tərkisilah ediləcək və ləğv olunacaq. Sonda isə hakimiyyətin tamamilə Azərbaycan hökumətinə veriləcək".

Şahnazaryan qeyd edib ki, digər detalları açıqlamaq istəmir. Lakin əlavə edib ki, bu “yol xəritəsi"nin həyata keçirilməsi üçün 12 ay müddət nəzərdə tutulub.

D.Şahnazaryan bildirib ki, Azərbaycanın bu proqramı Ermənistan hakimiyyətinə göndərdiyinə dair onda məlumat var.