Türkiyədə uğursuz hərbi çevriliş cəhdindən sonra Silahlı Qüvvələrindən 3 185 nəfər xaric edilib. 

Xeberinfo.com:   Məlumata görə, bunu Türkiyənin müdafiə naziri Fikri Işık "Haberturk" telekanalına müsahibəsində deyib. 

O bildirib ki, ordudan xaric edilən hərbçilərin 151-i general və admiraldır: “Hərbi çevriliş cəhdi və Fətullahçı Terror Təşkilatı (FETÖ) ilə bağlı 265 pilot ordudan xaric edilib. Hazırda fövqəladə durumlarda tələb olunan sayda pilot olsa da, pilotların ümumi sayı Türkiyə ordusu üçün zəruri həddən azdır. Türkiyədə 133-ü general, 3-ü attaşe olmaqla 162 hərbçi fəraridir”.

Müdafiə naziri hərbi çevriliş günü çevriliş tərəfdarlarının əsas bazası rolunu oynayan Ankaradakı Akıncı Hərbi Hava Bazasının yerində Demokratiya parkı salınacağı da açıqlayıb: “Sentyabrın 15-dək Ankara və İstanbulda dislokasiya olunan hərbi hissələri köçürməyi planlaşdırırıq. Bəzi hərbi hissələr 10 gün, bəziləri 20 gün, bəziləri isə bir aya köçürüləcək. “Akıncı” hərbi aviabazasının yerində Demokratiya parkının salınması nəzərdə tutulub".