Son günlər sosial şəbəkələrdə şəhidlərimizin qanı bahasına və qazilərimizin hünəri sayəsində düşmən tapdağından azad edilən ulu yurd yelərimizə qayıtmaq istəməyənləri qınayan yazıların sayı anban artmaqdadır.

Yenixeber.org: Bəzilərini bilmirəm, Allahın izniylə şəxsən mən özüm iyirmi səkkiz ilə yaxın həsrətini çəkdiyim  Cəbrayıla qayıdanların ilk sıralarında qoşulacağam. İnşallah hamınız o əziz günün şahidi olacaqsınız...

Halallıq ver gedim, Kürüm,

Gözləyir Qurbanim, Pərim.

Xudafərin nazlı Dirim –

Araz ünvanlım, gəlirəm.

Ulu Tanrım verdi aman,

Xar oldu savaşda “yaman”.

Haqq evim Hacı Qaraman –

Səbri gümanlım, gəlirəm.

Cəbrayılım - ata elim,

Açıq alnım, “uzun” dilim.

Sona çatıb ta nisgilim –

Şərəflim-şanlım, gəlirəm.

Teyim, Qalam, Ziyaratım,

Şanım-şöhrətim, urvatım.

Büllur Kəhriz toy-büsatım –

Tarım-kamanlım, gəlirəm.

Yovşan ətirli Gəyənim,

Ərəni-mərdi öyənim.

Geriyə qayıt deyənim –

 Düşmənlə qanlım, gəlirəm.

Tumasatam, Ağoğlanım,

Ta sızlamaz bir də canım.

Gordubabam, adım-sanım –

Yazı dumanlım, gəlirəm.

Əsiri olmadım yadın,

Damağımda qalıb dadın.

Dilimdən düşməyib adın –

Böyük Mərcanlım, gəlirəm.