AZ
RU
QƏDR GECƏSİ
Xeberinfo.com:
Əlimi uzadıb üzü göylərə,
dya eləyirəm...Gecə yarıda...
Bağışla, ya Rəbbim,
Gec anlamışam
günah saymadığım günahları da!,
Qədr gecəsidir...Açıqdır qapın,
Yəqin eşidirsən dualarımı.
Hifz elə, ya Rəbbim bu Yer üzünü,
saxla qanadında balalarımı!
Pis günə qoymuşuq gözəl dünyanı,
Uymuşuq şeytana,
uymuşuq felə.
Qaytar, öz yoluna yol azanları,
Özün yaratmısan,
özün rəhm elə!
Nə qədər dünyada əsir-yesir var,
Əzən də insandır,
bezən də insan.
İşləmir qoyduğun mizan-tərəzi--
bir gözündə qandır, birində vicdan!
Səni arayırıq dara düşəndə,
Əlac diləyirik dərddə, ağrıda.
Qəribə məxluqdur yaratdıqların--
oğru da çağırır səni,
doğru da.
Nəfsin əsiridir.
quludur insan.
Əyləşib taxtında iblis şah kimi.
İnsaf da, sevgi də yalan boyalı
qiymətdən salınıb bir matah kimi!
Allahım!
Nə desəm sənə əyandır:
İnsan insan olsa gülər bu dünya.
Əgər əsirgəsən Yerə kolgəni,
Bir anda yox olar,
ölər bu dünya!
Əlimi uzadıb üzü göylərə,
dua eləyirəm.. Gecə yarıda...
Bağışla, ya Rəbbim,
gec anlamışam
günah saymadığım günahları da!...
