Facebook və Instagram sosial şəbəkələri Rusiyanın Ukraynaya təcavüzü ilə bağlı qeyri-adi addım atıb.

Yenixeber.org: Şəbəkə istifadəçiləri müharibə ilə bağlı mesajlarında Rusiya hərbçilərinə (hərbi əsirlər istisna olmaqla) qarşı zorakılığa, habelə Rusiya prezidenti Putini və Belarus prezidenti Lukaşenkonu öldürməyə çağırış edə bilərlər.

Meta-nın daxili elektron məktubunda bildirilir ki, platformanın siyasətindəki bu müvəqqəti dəyişiklik Azərbaycan, Ermənistan, Estoniya, Gürcüstan, Macarıstan, Latviya, Litva, Polşa, Rumıniya, Rusiya, Slovakiya və Ukrayna seqmentinə aiddir. Məktubda qeyd olunur ki, liderlərin ölümünə çağırışa o hallarda icazə veriləcək ki, bu, müharibədən kənar məqsəd daşımasın, həmçinin bu çağırışda onların ölümünün məkan və metodları barədə məlumatlar yer almasın: “Biz, əvvəl olduğu kimi, Rusiyanın etimada layiq vətəndaşlarına qarşı zorakılıq çağırışlarına yol verməyəcəyik”.

Qeyd edək ki, bu qərar Rusiyada ciddi narazılıq doğurub. Rusiyanın Vaşinqtondakı səfirliyindən bildirilib ki, Meta-nin qərarı aqressiv və cinayətkar xarakter daşıyır, rusiyalılara qarşı düşmənçilik və nifrəti təbliğ edir. Rusiya səfirliyi Meta-nın “ekstremist fəaliyyətinin” dayandırılmasını və günahkarların məsuliyyətə cəlb olunmasını tələb edib.(Reuters)