Əgər Rusiya həqiqətən də payızda yeni məcburi səfərbərlik dalğasına başlasa, bu, müharibənin başa çatmasını gecikdirə bilər, lakin onun nəticəsini prinsipial şəkildə dəyişməyəcək.

Yenixeberorg.com: Bu sözləri “Foundation for Defense of Democracies” təşkilatının Rusiya proqramı üzrə direktor müavini Con Hardie bildirib.

“Hazırda Rusiya ordusunun əsas problemi canlı qüvvənin sayının azlığı deyil, şəxsi heyətin keyfiyyətidir. Əlavə səfərbər edilənlər Rusiyaya yalnız ayrı-ayrı istiqamətlərdə tədricən irəliləməyə kömək edə bilər, lakin Ukraynanın müdafiə xəttini yarmağa zəmanət vermir.

Əgər Putin yenidən səfərbərlik keçirməyə qərar versə, bu, onun müharibənin uduzulan istiqamətdə getdiyini qəbul etdiyini, lakin tələblərini yumşaltmaq əvəzinə onları daha da artırmağa qərar verdiyini göstərəcək. Putin indiyədək bu variantdan yayınırdı, çünki bu, ciddi xərclər və risklərlə müşayiət olunur. Bu, ölkədən növbəti kütləvi köç dalğasına səbəb ola və getdikcə daha da populyar olmayan müharibəyə qarşı daxildə etirazları alovlandıra bilər”, - C.Hardie vurğulayıb.

Qeyd edək ki, daha öncə Rusiyanın 300 mindən 500 minədək şəxsi səfərbər edəcəyi xəbəri yayılıb.