AZ
RU
800-dək neftçi ixtisara düşəcək
Gələn aydan etibarən “Azərneftyağ” və Heydər Əliyev adına Neft Emalı zavodlarında ixtisarlar ediləcək
"Xeberinfo.com": Bu barədə Neftçilərin Hüquqlarını Müdafiə Təşkilatının sədri Mirvari Qəhrəmanlı sosial şəbəkədə məlumat yayıb. Hüquq müdafiəçisi bildirib ki, iki zavoddan 800-ə yaxın işçi işdən çıxarılacaq: “Təşkilatımıza daxil olan məlumatda deyilir ki, aparılacaq struktur islahatları ilə bağlı “Azərneftyağ” neft emalı zavodundan 420 nəfərə yaxın işçi ixtisara salınacaq. Neft Emalı Zavodunda isə 300-dən çox işçi ixtisara düşəcək”.
Ümumilikdə isə ilin sonunadək neft sektorunda 1500-ə yaxın neftçi işini itirəcək. Artıq “Azəriqaz” İstehsalat Birliyində ixtisara düşənlərin sayı 100-ü ötüb.
İxtisara düşən neft və qaz işçiləri Dövlət Neft Şirkətinin İnsan Resursları Departamentində attestasiyadan keçirilir.
M.Qəhrəmanlı deyib ki, 12 baldan yuxarı toplayanlar ixtisara salınmır. Bu proses “Azəriqaz” işçiləri üçün də keçərlidir: “Amma təəssüf ki, 12 bal toplaya bilməyən işçilər var. İllərdir qaz sahəsində işləyənlər 12 bal toplaya bilmirlər. Çünki qaz işçilərinin əksəriyyəti ixtisasına uyğun çalışmayıb, onlar abonentlərdən qaz pulu yığmaqla məşğul olublar. Yüksək bal toplaya bilmədiyindən işdən çıxarılmalar isə narazılıqlarla qarşılanır. Lakin ixtisarlar zamanı yaxşı nəticə göstərənlərin işdə saxlanılması qanunvericiliklə tənzimlənir”.
