Amerika Birləşmiş Ştatlarının (ABŞ) və Ukraynanın Prezidentləri Co Bayden və Vladimir Zelenski telefon danışığı aparıblar.

Yenixeber.org: Danışıqlarda Amerika lideri bəyan edib ki, Vaşinqton və müttəfiqləri Ukrayna sərhədində situasiyanın pisləşməsi halında qətiyyətlə cavab verəcəklər.

Bu barədə Ağ Evin mətbuat katibi Cen Psaki xəbər verib.

«Prezident Bayden açıq şəkildə anladıb ki, əgər Rusiya bundan sonra da Ukraynaya soxulacaqsa ABŞ, müttəfiqləri və həmkarları qəti cavab verəcəklər» - Psaki qeyd edib.

Əlavə olunur ki, liderlər ümid etdiklərini bildiriblər ki, Rusiya ilə qarşıdan gələn danışıq çərçivəsində NATO və ATƏT xətti ilə diplomatik səyləri dəstəkləyəcəklər. Bundan başqa, telefon danışığı zamanı Bayden Zelenskiyə Vaşinqtonun Ukraynanın ərazi bütövlüyünə sadiq olduğunu təsdiqləyib.

«O, həm də gərginliyin azaldılması məqsədilə Donbassda inamın möhkəmləndirilməsi və Minsk razılaşmasının reallaşdırılması üçün aktiv diplomatiyanın irəli aparılmasına dəstək ifadə edib» - Ağ Evin nümayəndəsinin bəyanatında deyilir.