AZ
RU
“MÜHARİBƏ 2024-cü İLƏ QƏDƏR UZANA BİLƏR” –“NATO Rusiyaya daxil olacaq”
“Müharibənin 2024-cü ilə qədər uzanması ehtimallardan biridir. Həmin il ABŞ-da, Rusiyada və Ukraynada seçkilər gözlənilir və bu müharibədə qələbəni 2024-cü ilə, məhz seçki öncəsinə qədər uzatmaq hamıya sərf edir”.
Yenixeber.org: Bunu tanınmış ukraynalı hərbi ekspert Oleq Jdanov bildirib.
Onun sözlərinə görə, artıq Rusiyanın dünyanın geosiyasi xəritəsində önəmli dövlət kimi qalması Avropa və Vatikandan başqa heç kimin marağında deyil: “Bəlkə də biz Rusiyanı o dərəcədə darmadağın edəcəyik ki, NATO Rusiyaya daxil olacaq və onun nüvə potensialını nəzarətə götürərək, MAQATE-nin ixtiyarına verəcək və məhv edəcək. Bundan sonra isə Rusiya adi dövlətə çevriləcək və geosiyasi proseslərə təsir göstərə bilməyəcək”.
Qeyd edək ki, son zamanlar Qərbdə də müharibənin 2024-cü ilə qədər uzanacağına dair proqnozlar tez-tez eşidilməkdədir. ABŞ və NATO-nun Ukraynaya silah tədarükünü kəskin şəkildə artırmaması, lazım olan silahları yenə “kiçik dozalarla” verməsi, digər yandan Rusiyanın yeni səfərbərliyə hazırlaşmasına dair xəbərlər onu göstərir ki, tərəflər müharibəni sona çatdırmağa tələsmirlər. Bundan ən çox əzab çəkən isə Ukrayna dövləti və xalqıdır.
