AZ
RU
Köçəryandan Sərkisyana Qarabağ cavabı
Ermənistanın keçmiş prezidenti Robert Köçəryan prezident Serj Sərkisyanın Dağlıq Qarabağın Ermənistan ərazisi olmadığı və Gömrük İttifaqına Ermənistanla birlikdə daxil ola bilməyəcəyinə dair bəyanatına cavab verib.
"Xeberinfo.com" saytı erməni mənbələrinə istinadən xəbər verir ki, R.Köçəryan S.Sərkisyanın Astanadan qayıdandan iki gün sonra, ötən şənbə günü verdiyi və müxalifətin sərt tənqidlərinə səbəb olan bəyanatı ilə bağlı köməkçisi vasitəsilə yaydığı açıqlamada bildirib: “Hansısa beynəlxalq təşkilata üzvlük Ermənistanla Dağlıq Qarabağ arasında baryerlər qoymağa haqq qazandıra bilməz”.
Qeyd edək ki, Ermənistanın Astanada təsis olunan Avrasiya İttifaqına ancaq BMT tərəfindən tanınmış indiki sərhədləri çərçivəsində daxil ola biləcəyini Azərbaycan prezidenti İlham Əliyev ittifaqı təsis edən ölkələrin prezidentlərinə göndərdiyi məktubda bildirib. Azərbaycan prezidentinin bu şərtini Qazaxıstan dövlət başçısı Nursultan Nazarbayev elan edib. Sərkisyan Nazarbayevin dediklərini eşidəndə olduqca pərt olub, sözügedən şərtlə bağlı heç bir reaksiya bildirməyib və İrəvana dilxor qayıdıb. Daha sonra bildirib ki, Ermənistanın Avrasiya İttifaqına Dağlıq Qarabağla birlikdə getməsi mümkün deyil, çünki Dağlıq Qarabağ Ermənistan ərazisi sayılmır. Sərkisyanın bu bəyanatı erməni müxalifətinin kəskin tənqidlərinə səbəb olub.
