Əgər biz ölkə, xalq olaraq Qarabağ məsələsinin “Qordi düyünü”nü açmaq istəyiriksə, bu il işğal olunmuş ərazilərimizdə antiterror əməliyyatı keçirməliyik.

Yenixeber.org: Bu sözləri Ermənistan Baş naziri Nikol Paşinyanın “Azərbaycan kompromisə getməsə, biz də getməyəcəyik” bəyanatına münasibət bildirən politoloq Əhəd Məmmədli deyib. O bildirib ki, Paşinyan Qarabağ klanı və Rusiyadan daha çox, erməni xalqının təzyiqindən qorxur:

“Paşinyan Ermənistanın “Qordi düyünü”nün Qarabağ problemi olduğunu desə belə, bununla heç nə dəyişməyəcək. O vaxt dəyişiklik ola bilər ki, Paşinyan güzəştlərə getməyə hazır olduqlarını bəyan etsin. Paşinyan isə bunun əksini edərək, Azərbaycanın güzəştlərə getməsini gözləyir. Üstəlik də deyir ki, Qarabağın müqəddəratını həll etmək üçün ətraf işğal edilmiş 5 rayonu da azad etməyəcək. İşğal edilmiş digər iki rayon - Kəlbəcər və Laçından söz belə etmir. Çünki ermənilər cüzi güzəştlərə belə hazır deyil. Həm Paşinyan, həm də onun xalqının güzəştə getməyə məcbur edilməsinin yeganə yolu Azərbaycan Ordusudur. Ermənistanı eyforiyadan ayıltmaq üçün soyuq bir duş lazımdır ki, bunu da ancaq Azərbaycan əsgəri edə bilər”.

Qeyd edək ki, Kölndə erməni icmasıyla görüşü zamanı Ermənistan Baş naziri Nikol Paşinyan ilk olaraq Azərbaycanın kompromisə getməli olduğunu deyib.(axar)