Bu video məncə, narkotik istifadəçiləri ilə bağlı vəziyyətin nə yerdə olduğundan xəbər verir. Paylaşmağımın səbəbi isə təhlükəli durumda olan 2 yaşlı körpədir. Hər gün axşam saatlarında Qaraçuxur məscidinin qarşısında qadın uşağını diləndirir. Əldə etdiyi məbləğ də məlum yerə, yəni natkotik almağa sərf edilir... Həm özü, həm əri bu vəziyyətdədir.

Yenixeber.org: Bu sözləri “Azərbaycan Uşaqları” İctimai Birliyinin sədri Kəmalə Ağazadə instaqramda paylaşıb.

Suraxanı Rayon İcra Hakimiyyətinə müraciət edən Kəmalə Ağazadə uşağın valideynlərin əlindən alınmasını tələb edib: “Bir neçə ay öncə bu ailənin qaldığı evin yanında qarajda yanğın çıxıb. Bu insanlar həmin qarajda kimlərləsə, nələrsə edib, bunu artıq FHN əməkdaşları bilər. Amma mənim narahatçılığım 2 yaşlı uşaqdır. Kim zəmanət verə bilər ki, yanğın yenidən çıxmayacaq? Artıq qaraj yoxdur, yenidən yanğın çıxara bilərlər, o zaman uşağın aqibətini siz deyin...

Həmin evin ünvanı məndədir. Aidiyyəti qurumlar istəyirsə, verim. Birbaşa paylaşmadan öncə neçə dəfə olub ki, məlumatı göndərmişəm, nəticəsi effektli olmayıb. Media isə dərhal reaksiya verib, ictimailəşdirdiyi üçün bunu paylaşmaq zorundayam”.