Yanvarın 10-da Qazaxıstanda 34 beynəlxalq aviareysin yerinə yetirilməsi planlaşdırılır.

Yenixeber.org: “Zakon” xəbər verir ki, bu barədə ölkənin Sənaye və İnfrastruktur Nazirliyinin Mülki Aviasiya Komitəsindən bildirilib.

Məlumata görə, Nur-Sultandan 19 beynəlxalq aviareysin həyata keçirilməsi nəzərdə tutulub. Qazaxıstan paytaxtından Rusiyanın Moskva, Birləşmiş Ərəb Əmirliklərinin Dubay, Polşanın Varşava, Almaniyanın Frankfurt, Özbəkistanın Daşkənd, Türkiyənin İstanbul, Tailandın Pxuket şəhərləri istiqamətində uçuşlar olacaq. Frankfurt və Rusiyanın Yekaterinburq şəhərindən Nur-Sultana 4 reys isə təxirə salınıb.

Bu gün Qazaxıstanın Aktau, Şımkənt, Türküstan və Aktobe şəhərlərindən BƏƏ-nin Dubay, Türkiyənin İstanbul, Gürcüstanın Tbilisi, Ermənistanın İrəvan, Özbəkistanın Daşkənd, Tailandın Pxuket şəhərlərinə 15 beynəlxalq uçuş planlaşdırılıb. Almatı və Aktaudan Türkiyənin İstanbul, BƏƏ-nin Dubay və Abu-Dabi, Özbəkistanın Daşkənd və Urqenç, Rusiyanın Moskva, Ukraynanın Kiyev şəhərlərinə 14 reys isə təxirə salınıb.

Bir müddət əvvəl Rusiyanın “Aeroflot” aviaşirkətinin Nur-Sultana uçuşları bərpa etməsinə dair xəbərlər yayılıb.