Bu ilin yanvar-iyul aylarında Gürcüstan Azərbaycandan 234,2 milyon ABŞ dolları dəyərində yanacaq və sürtkü yağı idxal edib.

Yenixeberorg.com-un Gürcüstanın Milli Statistika İdarəsinin məlumatları əsasında apardığı hesablamalarına əsasən, bu, ötən ilin eyni dövrünün göstəricisindən 27 % çoxdur.

Beləliklə, Azərbaycan Gürcüstana yanacaq və sürtkü yağı tədarük edən ölkələr sırasında 2-ci yerdə qərarlaşıb.

Təkcə iyulda isə Gürcüstan Azərbaycandan 26,2 milyon ABŞ dolları dəyərində yanacaq və sürtkü yağı alıb ki, bu da bir il əvvəlki göstəricilərdən 3,2 % çoxdur.

Bu ilin ilk 7 ayı ərzində Gürcüstan xarici ölkələrdən 1 milyard 592 milyon ABŞ dolları dəyərində yanacaq və sürtkü yağları alıb ki, bu da 1 il əvvəlki göstəricidən 51,5 % çoxdur.

Hesabat dövründə Gürcüstan Rusiyadan 740,4 milyon ABŞ dolları, Türkiyədən 150,7 milyon ABŞ dolları, Rumıniyadan 130,8 milyon ABŞ dolları, Belarusdan 56,6 milyon ABŞ dolları dəyərində məhsul idxal edib.

Xatırladaq ki, 2025-ci ildə Gürcüstan xaricdən 1,6 milyard ABŞ dolları dəyərində yanacaq və sürtkü yağları alıb ki, bunun da 145 milyon ABŞ dolları Azərbaycanın payına düşüb.