“Zülfiyyə Hüseynova prezident təqaüdü almamağından şikayətlənir? Bəs o bu təqaüdü nə üçün almalıdır ki?” 

      "xeberinfo.com": Bunu Azərbaycanın gənclər və idman naziri Azad Rəhimov  5 dəfə sambo, 4 dəfə cüdo üzrə dünya çempionu, 2 qat Avropa çempionu, hərbçilər arasında olimpiya çempionu Zülfiyyə Hüseynovanın şikayətinə cavab olaraq bildirib. Xatırladaq ki, Zülfiyyə Hüseynova haqqının yeyildiyini söyləmişdi: “Mən idman ustasıyam, nəticələrim var, amma buna baxmayaraq prezident təqaüdü almıram. Dəfələrlə cənab prezidentə məktub ünvanlamışam, amma imkan vermirlər məktub gedib çatsın, mane olurlar. Bizim məmurlarımızın çoxu üçün bayraqdansa 30 sm yubka önəmlidir, onlar bununla maraqlanırlar. Nəyə görə mən haqqımı istəməyim, mən ki sizdən sizə aid olanı istəmirəm ki, mənə, özümə aid olanı, əziyyətimin qarşılığını istəyirəm”.

      Azad Rəhimov məsələ ilə əlaqədar bunları deyib: “Onun ən yaxşı nəticəsi hansıdır? Qeyri-olimpiya idman növü olan samboda çempion titulu. Gənc qadındır, yaxşı maaşlı işi var. Təqaüd niyə ödənməlidir? İstənilən halda, nazirlik bu məsələdə keçmiş idmançının söylədiyi kimi heç bir maneə yaratmır”.