44 günlük Qarabağ müharibəsi ilə əlaqədar Ermənistanda 1580 cinayət işi açılıb.

Yenixeber.org: Bu barədə Ermənistanın Baş prokurorluğu məlumat yayıb. Qeyd edilib ki, 628 nəfər təqsirləndirilən şəxs qismində cəlb edilib. Təqsirləndirilənlər arasında adları hələ açıqlanmayan yüksək rütbəli zabitlər də var. İrimiqyaslı cinayət işlərinin istintaqı əsas bir neçə istiqamətdə aparılır: hərbi xidmətə çağırış və səfərbərlik zamanı pozuntular, müharibədən əvvəl və müharibə zamanı silah alınmasında mümkün korrupsiya sxemləri, Silahlı Qüvvələrin və ayrı-ayrı bölmələrin idarə edilməsində cinayət xarakterli pozuntular, taktiki və strateji əməliyyatların həyata keçirilməsi, komandanlığın əmrlərinə tabe olmamaq.

Bundan əlavə, Milli Təhlükəsizlik Xidməti Şuşa və Hadrutla bağlı mediada və sosial şəbəkələrdə yayımlanan materialları araşdırıb.

Prokurorluğun nümayəndəsi Edqar Arsenyanın sözlərinə görə, söhbət Şuşa və Hadrut ətrafında döyüşlərdən gedir. O bildirib ki, daha bir cinayət işi dövlətə xəyanət səbəbilə başlanıb. Hərbi qulluqçuların valideynlərindən pul tələb etmə faktları üzrə isə 5 cinayət işi açılıb.