Yenixeber.org: Xatırladaq ki, hələ 2019-cu ilin ikinci yarısında Sabunçu Rayon İcra Hakimiyyətində Azərbaycan Respublikasının Baş Prokurorluğu yanında Korrupsiyaya qarşı Mübarizə Baş İdarəsi tərəfindən yoxlama aparılmış və icra hakimiyyətinin Həbib adlı işçisi iş otağındakı seyfində tapılan 280.000 (iki yüz səksən min) manatla birlikdə həbs edilmişdi. Qısa müddət sonra yayılan məlumatlarda isə, korrupsiya cinayətiylə həbs edildiyi deyilən Həbib məhkəmə qərarı ilə azadlığa buraxılmışdı.

Sosial medianın məlumatına görə Həbib daha çox Sabunçu Rayon İcra Hakimiyyətinin başçısı Adil Vəliyevin sağ əli və rayon ərazisində tikintiyə nəzarət edən şəxs kimi tanınırdı, onun azadlığa buraxılmasında isə, məhz Vəliyevin böyük rol oynadığı, məhkəmə qərarına müdaxilə etdiyi deyilirdi.

Bundan əlavə, 2023-cü ilin sonlarında Adil Vəliyevin qısa zamanda vəzifədən gedəcəyi barədə məlumatlar dərc edildi. Lakin, Vəliyevin “qoruyucu mələyi”, ya da “şəxsi büdcəsi” bu xəbəri də yalan çıxarmağa nail ola bildi.

 Bütün bu olanlara nəzər saldıqda, adam Adil Vəliyevin jurnalist Əvəz Zeynallının məhkəməsində işlətdiyi ifadəyə haqq qazandırır — “Elə bil Azərbaycanda yaşamırsınız?!”.

 Demək olar ki, qanunlarımızın tələblərinə zidd olaraq, məmur olduğu halda, həm də bizneslə məşğul olan Adil Vəliyev istədiyini edir. Məhz bu səbəbdən, Azərbaycanda qanunsuz işlərin maneəsiz mövcudluğu təəccüb doğurur.

Qeyd edək ki, bu ifadəni jurnalist Əvəz Zeynallının məhkəməsində Sabunçu rayon icra hakimiyyətinin başçısı Adil Vəliyev işlədib. O, qanunsuz tikintinin aparılması ilə bağlı suala: “Hətta tikinti qanunsuz olsa belə, İcra Hakimiyyətinin onu sökməyə ixtiyarı yoxdur. İnşa prosesi dayandırılmalı, məhkəməyə müraciət olunmalıdır. Lakin praktikada bir sıra hallarda qanunsuz tikinti aparılanda müdaxilə edib, sökürlər”, — deyə, cavab vermişdi.

Vəkilin: “Sizin səlahiyyətiniz olmadığı halda, necə müdaxilə edirsiniz?” — sualını isə, Vəliyev rişxəndlə: “Elə danışırsınız ki, sanki Azərbaycanda yaşamırsınız…” — deyə. cavablandırmışdı.

Bir dövlət məmurunun, bir qurum rəhbərinin dilindən eşidilən bu cümlə gülüncdür. Bu, eyni zamanda, öz konstitusiyası olan müstəqil dövlət üçün dəhşət doğurur.

Söhbət qanunsuz tikintilərdən düşmüşkən, özünün dediyi kimi, tikinti qanunsuz olduqda, inşa prosesi dayandırılmalı, məhkəməyə müraciət olunmalıdır. Hətta praktikada bir sıra hallarda müdaxilə edib, sökdüklərini etiraf edən icra başçısına bizim də xatırlatmaq istədiyimiz olaylar var.

Bir ildən çoxdur ki, Sabunçu rayonunun Zabrat 1, Balaxanı, Bakıxanov qəsəbələrində, Sabunçu qəsəbəsinin Elşən Mehdiyev küçəsində aparılan qanunsuz tikintilər, eləcə də Sabunçu qəsəbəsi, Qambay Vəzirov küçəsində, neft şirkətinə məxsus ərazidə qanunsuz inşa olunan 3 mərtəbəli iaşə obyekti barəsində, dəfələrlə, Sabunçu Rayon İcra Hakimiyyəti də daxil olmaqla, bütün aidiyyatı qurumlara rəsmi sorğular göndərib, qanuni tədbirlər görmələrini xahiş etmişik. Lakin, sözügedən icra hakimiyyətinin başçısı həmin iaşə obyektinin tikintisi aparılarkən, ifadəsində qeyd etdiyi kimi, nə işi dayandırdı, nə məhkəməyə müraciət etdi, nə də etiraf etdiyi istisnalar kimi müdaxilə edib,  sökdürdü.

Qeyd edək ki, Qambay Vəzirov küçəsində neft şirkətinə məxsus ərazidə qanunsuz inşa edilmiş və bu gün də fəaliyyət göstərən 3 mərtəbəli iaşə obyekti barəsində də, heç bir dövlət qurumu tədbir görmür.

Redaksiyaya daxil olan məlumata görə obyektin sahibi olan iş adamı, bəzi şəxslərin yanında: “Mən işimi yuxarılarla görürəm” — deyə, mətbuatda yazılan məlumatların onu zərrə qədər narahat etmədiyini vurğulayıb.

Görünür, sahibkarlara qanunsuz işlər görmələri üçün şəxsi maraqları xatirinə icazə verən həmin “yuxarı”lar barəsində, daha yuxarıların qanuni tədbir görmələri zəruridir.