“Qonşu ölkələrlə münasibətlərin dərinləşdirilməsi və ya normallaşdırılması Ermənistan hakimiyyəti üçün ən vacib məsələlərdən biridir”.
Yenixeber.org: “Sputnik Armenia” xəbər verir ki, bu sözləri Ermənistanın baş naziri Nikol Paşinyan hökumət iclasında deyib. O bildirib ki, Ermənistan bölgədə kommunikasiyaların açılması məsələsi barədə qətiyyətli mövqedədir:
“Bildiyiniz kimi, yenidən baş nazir vəzifəsinə seçildikdən sonra İrana səfər etdim və bu gün Gürcüstana gedirəm. Mən “Şimal-Cənub” layihəsinə önəm verirəm. Bundan əlavə, Ermənistanın Rusiya və İranla dəmir yolu əlaqəsi qurması da son dərəcə vacibdir. Bu məsələnin üçtərəfli formatda (Ermənistan, Rusiya, Azərbaycan) həlli üçün kommunikasiyaların açılması məsələsi müzakirə olunur”.
Paşinyan çıxışı zamanı Azərbaycanla sərhədin delimitasiyası və demarkasiyası məsələlərinin də vacib olduğunu qeyd edib:
"Bakının Naxçıvanla quru yolla əlaqə qurmaq istədiyini anlayırıq. Bu barədə konkret nəticələr əldə etmək üçün səy göstərməyə qərarlıyıq və hazırıq. Lazımi şəraitin qurulması üçün çalışmağa davam edirik”.