Ermənistanın Baş naziri Nikol Paşinyan ötən gün parlamentdə keçirilən dinləmələrdə onu ittiham edən müxalifətə sərt cavab verib.

Yenixeber.org: Qarabağın taleyilə bağlı danışan Paşinyan ondan əvvəlki hakimiyyəti (indiki müxalifəti-red.) Qarabağın mümkün son statusuyla bağlı erməni cəmiyyətinə yalan məlumatlar verməkdə günahlandırıb. Baş nazir qeyd edib ki, Azərbaycan tərəfilə danışıqlarda Qarabağın Azərbaycandan kənar hər hansı statusa malik olması müzakirə mövzusu olmayıb: “Qarabağın yekun statusu mütləq şəkildə Qarabağın müstəqilliyi anlamını daşımır. Bundan başqa, danışıqlar prosesində Qarabağın statusuna dair referendumun harada keçirilməsilə bağlı heç nə qeydə alınmayıb. Orada xeyli incə məqamlar var”.

Paşinyanın dediyinə görə, erməni cəmiyyətində belə bir rəy yaradılıb ki, guya Qarabağın son statusu mütləq onun müstəqilliyi deməkdir və ardınca, deputatlardan soruşub: “Kim deyib bunu? Yekun status sadəcə, hansısa müəyyən statusu nəzərdə tutur”. Baş nazir bir daha müxalifətə və cəmiyyətə üzünü tutaraq, ötənilki müharibənin qaçılmaz olduğunu bildirib və işin bu yerə çatmasınnda özündən əvvəlki hakimiyyəti günahlandırıb: “Mən deyirəm ki, müharibənin qarşısının alınmasının yeganə yolu Qarabağın yekun statusu müəyyən edilmədən torpaqların qaytarılması idi.”

Paşinyan bildirib ki, ondan əvvəlki hakimiyyət hətta nəzəri cəhətdən də Qarabağın Azərbaycandan kənarda mövcudluğuna imkan yeri qoymayıb. Baş nazir qapalı iclas keçirilməsini təklif edib və dediklərilə bağlı bütün sənədləri ortaya qoymağa hazır olduğunu qeyd edib.

Göründüyü kimi, Paşinyan və onun hakimiyyəti getdikcə daha əsaslı şəkildə erməni cəmiyyətini Qarabağla bağlı boş xülyalardan vaz keçməyə, ayılmağa doğru istiqamətləndirir. Və bu yanaşmanı ermənilər nə qədər tez dərk və qəbul etsələr, bir o qədər özləri üçün yaxşıdır.