Əfqanıstandakı “Taliban” hökuməti baş nazirinin müavini Molla Əbdülqəni Biradər dünyanı əfqan xalqına humanitar yardıma çağırıb.

Yenixeber.org: “Biz beynəlxalq ictimaiyyəti və humanitar yardım təşkilatlarını vətəndaşlarımızı unutmamağa çağırırıq”, - deyə o bəyan edib.

Video mesajında Əfqanıstanın həssas bir dövrdə olduğunu dilə gətirən Biradər, 

"Bir tərəfdən sıxıcı sanksiyalar mövcuddur. Digər tərəfdən, Əfqanıstanda son 20 ildə vətəndaşların iş imkanlarını asanlaşdıracaq heç bir infrastruktur yoxdur. Təbii fəlakətlər, daşqınlar, güclü qar yağışı və pandemiya kimi hallarda təcili yardım lazımdır. Hazırda ölkəmizin bir çox yerlərində insanların təcili ərzaq, sığınacaq, geyim, dərman və nağd pula ehtiyacı var. Ona görə də biz siyasi mülahizələrlə yanaşı, dünyanın yardım etməklə öz humanitar borcunu yerinə yetirməsini gözləyirik”, - deyə hökumət başçısının müavini bildirib.

Qeyd edək ki, ötən ilin avqustunda “Taliban” Əfqanıstanda nəzarəti ələ keçirdikdən sonra ABŞ və Avropa ölkələri dövlətə məxsus milyardlarla dollar vəsaiti dondurub. Həmçinin, qlobal maliyyə institutları da Əfqanıstana ayrılan vəsaitləri dayandırıb.