Mərkəzi Bankın 2017-ci ildəki ilk valyuta hərracı göstərdi ki, AMB hər hərracda tələbdən dəfələrlə az valyuta çıxartmaqda israrlıdır, deyə iqtisadçı Natiq Cəfərli hesab edir.

Xeberinfo.com:   Turan-ın məlumatına görə, ekspertin fikrincə, bu addım “qara bazarı” təşviq edəcək, rəsmi məzənnə önəmini itirəcək.

N. Cəfərli qeyd edib ki, AMB-nin əsas vəzifəsi sərbəst valyuta alış-satışını bərpa etmək olmalıdır. Yoxsa qiymətlər daha sürətlə artacaq, mağazalar, apteklər getdikcə boşalacaq, olan-qalan investorlar da ölkədən qaçıb gedəcək, rəsmi məzənnə ilə real məzənnə arasında fərq böyüyəcək.

«Mərkəzi Bank 4%-lik, artıq mənasını itirmiş məzənnə marjını ləğv etməli, banklara sərbəstlik verməli, valyutadəyişmə məntəqələrinin yenidən açılmasına şərait yaratmalıdır. Başqa yol yoxdur, ölkəni məzənnə siyasətində Türkmənistana, Özbəkistana çevirmək olmaz, bu daha təhlükəlidir”, deyə N. Cəfərli hesab edir. Xatırladaq ki, 2017-ci ildəki ilk valyuta hərracında dolların məzənnəsi 1,7707-dan 1,7742 manata artıb.