Nərimanov rayonunda 200 nömrəli Məktəb-Lisey Kompleksinin korpusu acınacaqlı vəziyyətdədir

Yenixeber.org: Redaksiyamıza daxil olan video görüntülər Nərimanov rayonunda yerləşən 200 nömrəli Məktəb-Lisey Kompleksinin (MLK) binasının çox bərbad vəziyyətdə olduğunu ortaya qoyub.

Kadrlarda aydın görünür ki, təhsil ocağının korpusunda döşəmələr dağılıb, tavanlarda asılmış lüstrlar sınaraq salxaq vəziyyətdə qalıb. Qapılar sınıq, çürük və istifadəyə yararsız haldadır. Ümumi mənzərə məktəbin illərdir əsaslı təmir görmədiyini, şagirdlərin isə təhlükəli şəraitdə dərs oxumağa məcbur qaldığını sübut edir.

Valideynlərin sözlərinə görə, məktəb rəhbərliyinə və aidiyyəti qurumlara dəfələrlə müraciətlər edilsə də, indiyədək problemin həlli istiqamətində ciddi addım atılmayıb. Əksinə, hər keçən gün vəziyyət daha da pisləşir.

Belə vəziyyət isə həm şagirdlərin sağlamlığı, həm də tədrisin keyfiyyəti baxımından ciddi narahatlıq doğurur. Məsələ ilə bağlı aidiyyəti qurumların mövqeyini öyrənməyə çalışacağıq və nəticələri ictimaiyyətə çatdıracağıq.(patrulaz.az)