Toronto Fond Birjası Ermənistandakı "Əmulsar" qızıl mədənini işlədən “Lydian İnternational” şirkətinin sadə səhmlərinin alış-verişini dayandırıb.

Yenixeber.org: Bu qərar sözügedən şirkətin “Lydian Armenia” və s. törəmə şirkətləri ilə yanaşı, Kreditorlara Borcu Ödəmə Aktı çərçivəsində qorunma haqqı əldə etdikdən sonra verilib. Həmin hüquqi akta görə 5 milyon dollardan çox borcu olan müflis şirkətlər restrukturlaşma apara bilər.

Belə ki, “Lydian İnternational” və törəmə şirkətləri məhkəmə qərarı ilə 10 günlük qoruma haqqı əldə edib. Yanvarın 2-də başa çatacaq bu müddət ərzində kreditorlar adıçəkilən şirkətlər barəsində hər hansı tədbir görə bilməz.

Xatırladaq ki, 2018-ci ilin iyun ayından "Əmulsar" mədənini şirkətin üzünə bağlayan ekologiya fəalları və sadə vətəndaşlar burada irimiqyaslı ekoloji fəlakət baş verə biləcəyini bildirir. Hökumət hələ də mədənin mühasirəsini qaldıra bilməyib. “Lydian Armenia” şirkəti ilə müqavilənin müddəti isə bu il dekabrın 20-də başa çatıb.