ABŞ prezidenti Donald Trampın yanında kəşfiyyat qurumlarının rəhbərləri və nümayəndələri ilə qapalı görüş başlayıb.

Yenixeber.org: Görüşlə bağlı məlumat Ağ Evin saytında yerləşdirilsə də, müzakirə mövzusu açıqlanmayıb. Onun Yaxın Şərqdə geosiyasi gərginliyin artması və ABŞ-ın İrana qarşı sərt ritorikası fonunda keçirilməsi diqqəti cəlb edir. Son günlərdə ABŞ administrasiyasının rəsmiləri dəfələrlə Vaşinqtonun diplomatik irəliləyiş olmadığı təqdirdə müxtəlif variantları nəzərdən keçirməyə hazır olduğunu bildiriblər.

Tramp əvvəllər İrana doğru "nəhəng bir armada"nın gəldiyini və Tehranın nüvə silahlarının tamamilə ləğvini nəzərdə tutan "ədalətli və bərabər" bir razılaşma üzrə danışıqlara razı olacağına ümid etdiyini bildirmişdi. Amerika prezidenti xatırladıb ki, 2025-ci ilin iyun ayında ABŞ "Gecə cəkici" əməliyyatının bir hissəsi olaraq İranın nüvə obyektlərinə zərbələr endirib. O, "növbəti hücumun daha pis olacağını" bəyan edib və "bunun baş verməsinə yol verməməyə" çağırıb.

Lakin yayılan məlumatlara görə, İran yalnız nüvə sahəsində razılaşmaya gedə biləcəyini açıqlayaraq, raket proqramını heç kimlə müzakirə etməyəcəyini ABŞ tərəfinə çatdırıb.

Baş verən proseslər bu həftəsonu ABŞ-ın İrana zərbə endirəcəyi gözləntilərini gütdikcə gücləndirir.