Kiçik və Orta Biznesin İnkişafı Agentliyi (KOBİA) Qəbələdə “Ticarət və xidmət sahəsində mövcud imkanlar, çətinliklər və perspektivlər” mövzusuna həsr olunmuş tədbir keçirib.

Yenixeberorg.com: Sahibkarlarla baş tutan görüşdə Dövlət Vergi Xidməti, Azərbaycan Qida Təhlükəsizliyi Agentliyi, İqtisadiyyat Nazirliyinin Şəki-Zaqatala Regional Bölməsi, Qəbələ Rayon İcra Hakimiyyəti, Dövlət Məşğulluq Agentliyi, Antiinhisar və İstehlak Bazarına Nəzarət Dövlət Xidməti, Peşə Təhsili üzrə Dövlət Agentliyi, “Azəriqaz” İstehsalat Birliyi, Sahibkarlar (İşəgötürənlər) Təşkilatları Milli Konfederasiyası, Müvəkkil kredit təşkilatları və müvafiq sahibkarlıq subyektləri ilə yanaşı “Azərişıq” ASC-nin nümayəndələri də iştirak edib.

Qəbələ Elektrik Şəbəkəsinin (EŞ) rəisi Elvin Bayramzadə tədbirdə iştirak edən 30-dək sahibkarla fikir mübadiləsi aparıb. Onların müxtəlif məsələlərlə bağlı sualları cavablandırılıb. Həmçinin ticarət və xidmət sahəsində çalışan sahibkarlıq subyektlərinin elektrik şəbəkəsinə qoşulması, elektrik enerjisindən istifadə qaydaları, Səhmdar Cəmiyyətin həyata keçirdiyi elektron xidmətlərlə bağlı ətraflı məlumatlar verilib.

Qeyd edək ki, “Azərişıq” ASC fermer və sahibkarla regionlarda mütəmadi görüşlər təşkil edir, onların təklif, tövsiyələri dinlənilir. Məqsəd abonentlərin elektroenergetika sahəsində maarifləndirilməsi, keyfiyyətli və fasiləsiz elektrik enerjisi ilə təmin olunması, eləcə də elektrik enerjisi itkilərinin minimuma endirilməsidir.