Qəzzadakı Fələstinli qruplar, yeni növ koronavirus yoluxmalarının artması səbəbiylə İsrail həbsxanalarındakı fələstinli məhbusların beynəlxalq müstəvidə müdafiə olunmasını tələb edirlər.
Yenixeber.org: Fələstin İslami və Milli Müqavimət Qüvvələrinin Əsirlər Komitəsi tərəfindən İsrail həbsxanalarındakı fələstinli məhbusların qorunması üçün Qəzzada yerləşən İnsan Hüquqları üzrə Ali Komissarlığa, Qırmızı Xaç Komitəsinə, Ümumdünya Səhiyyə Təşkilatına və Birləşmiş Millətlər Təşkilatına yazılı açıqlama göndərilib.
Komitə tərəfindən göndərilən məktubda İsrail həbsxana rəhbərliyinin məhbuslara qarşı qəsdən tibbi səhlənkarlıq etdikləri və onlara qarşı hücumlarını davam etdirdikləri bildirilib.
Açıqlamada qeyd olunur ki, İsraildə virus daşıyıcısı olan israilli əsgər, həkim, zabit və məhbuslar fələstinli məhbuslarla təmas qurmaları üçün bilərək həbsxanalara yerləşdirilirlər. Həmçinin açıqlamada həbsxana rəhbərliyi tərəfindən fələstinlilərin yüksək təhsilli həkimlər tərəfindən müayinəsinə və həbsxana kameralarının dezinfeksiyasına izin verilmədiyi qeyd edilir.
COVID-19-a yoluxduğu deyilən fələstinli məhbus Kamal Nəcib Əbu Vaarın tibbi laqeydlik nəticəsində dünyasını dəyişdiyi deyilir.
Fələstinli məhbusların beynəlxalq müdafiəsinin təmin olunması, xəstə və yaşlı məhkumların isə qeyd-şərtsiz azad edilməsi istənilir.
Qeyd edək ki, hazırda İsrail həbsxanalarında 3600  inzibati, 160 uşaq və 41 qadın olmaqla 4700 fələstinli məhbus var.