Yenixeber.org:   "Bu gün Azərbaycan Dövlət İqtisad Universitetində (UNEC) Science slam unec proqramı üzrə universitet tələbələrinin elmi məruzələrinin təqdimatı tədbirinə qatılmışdım. Bir-birindən dəyərli, faydalı məruzələr dinlədik. Bu, onu göstərir ki, Azərbaycan tələbələrinə özünü təqdimetmə mühiti yaradılanda, öz potensiallarını yüksək səviyyədə ortaya qoya bilirlər".

Bu sözləri Strateq.az-a açıqlamasında millət vəkili Fazil Mustafa deyib.

Onun sözlərinə görə,  bu universitetdə tələbə təşəbbüskarlığı üçün müsbət bir ənənə yaranmaqdadır:

"Bu barədə əvvəllər də qeyd etmişdim, bir neçə belə tədbirin şahidi olduğuma görə indi də söyləyirəm. Universitetin rektoru professor Ədalət Muradov bu cür təşəbbüslərin ideya müəllifi və dəstəkçisi olduğuna görə ciddi universitet gəncliyinin cücərdiyini hiss edirsən. 9 tələbə hərəsi 10 dəqiqə müddətində müxtəlif mövzularda öz məruzələrini geniş auditoriyaya təqdim etdilər, auditoriyadan gələn alqışların texniki cihazla ölçülməsinə görə də onların içindən 3 nəfər qalib elan olundu. Ancaq mən hamısını qalib olaraq görürdüm, çünki hər biri üzərinə götürdüyü mövzunu səlis danışıqla, anlaşıqlı, əsaslandırılmış şəkildə təqdim edə bildi".

Millət vəkili bildirib ki, televiziyalarımız kütləvi şou zəhərlənməsindən başını qaldırıb, bu kimi tədbirləri insanlara təqdim etsələr, elmi biliklərə maraq göstərənlərin sayını da artırmış olarlar:

"Nəhayət, 21-ci əsrdə elm məbədi sayıla biləcək universitetlər yaratmağı düşünməliyik. Bu kimi tədbirlər tələbəyə özünü universitetin sahibi kimi hiss etməyə imkan yaradır. Müti, özünü təqdim etməkdən qorxan tələbədən yaxşı müəllim də olmur, yaxşı mütəxəssis də, yaxşı vətəndaş da…

Hər halda İqtisad Universitetindəki mühitin, sağlam rektor-tələbə dialoqunun bütün ali təhsil ocaqlarında olmasını ürəkdən arzulayıram".