Belarus prezidenti Aleksandr Lukaşenkonun Ermənistan ilə bağlı açıqlamasına Rəsmi İrəvan sərt reaksiya verib.
Yenixeber.org: “charter97.org” xəbər verir ki, bu barədə Ermənistanın baş naziri Nikol Paşinyan parlamentdə çıxışı zamanı danışıb.
Paşinyan bildirib ki, Lukaşenko dünya siyasətində fikrini dinləməyə dəyər fiqur deyil. Paşinyan arqument olaraq prezident seçkilərindən sonra etirazlar zamanı Lukaşenkonun Kalaşnikov avtomatı ilə Minsk ətrafında necə hərəkət etdiyini xatırladıb:
"Ermənistanda hadisələr baş verib: siz heç mənim küçələrdə avtomatla gəzdiyimi görmüsünüz?"
Paşinyanın sözlərinə görə, Ermənistanı Belarusla müqayisə etmək olmaz, çünki birincisi demokratik dövlətdir, ikincisi isə yox. O bildirib ki, Lukaşenko sadəcə olaraq erməni demokratiyasına və onun dünya səhnəsində tanınmasına paxıllıq edir:
“Ermənistanı demokratiya sammitinə dəvət edəndə, başqa dövlətlər dəvət olunmayanda onlar inciyirlər. Ermənistana demokratik ölkə deyəndə, amma onları belə adlandırmayanda, inciyirlər. Ermənistanda hakimiyyətin legitim, öz ölkələrində isə qeyri-legitim olduğunu deyəndə, inciyirlər”.
Qeyd edək ki, Belarus prezidenti Aleksandr Lukaşenko “Solovyev Live” YouTube kanalına müsahibəsində postsovet məkanının böyük hissəsinin ittifaq dövlətinə birləşməsi ehtimalını şərh edərkən Ermənistan haqqında bəzi fikirlər səsləndirib. “Ermənistanın getməyə yeri yoxdur. Səncə, onlar kiməsə lazımdır? Onlar bunu artıq görüblər, Nikol Vovayeviç (Paşinyan –red.) bunu görüb” -, deyə Lukaşenko bildirib.