Azərbaycan radioloqları ölkədə keçiriləcək beynəlxalq radiologiya konfransına qatılmaq üçün yüksək məbləğ tələb olunmasına etiraz edirlər.

Yenixeber.org: Bu barədə radioloq Aydın Əliyev sosial şəbəkə hesabında yazıb. O bildirib ki, 10–11 oktyabr 2025-ci il tarixlərində keçiriləcək tədbirdə iştirak etmək üçün radiologiya rezidentləri və gənc həkimlər çətin vəziyyətə salınıb.

Onun sözlərinə görə, konfransa qatılmaq üçün rezidentlər ayda 150 manat, üzv olmayan həkimlər isə 200 manat ödəməlidirlər. Halbuki rezidentlərin aylıq təqaüdü 520 manat, gənc həkimlərin maaşı isə çox vaxt 1000 manatı keçmir.

“İndiki iqtisadi böhran dövründə kirayədə qalan, xəstə valideynlərinə baxan gənc radioloqlar bu məbləği necə ödəsinlər? Onları inkişaf imkanından məhrum etmək ədalətsizlikdir. Heçmi utanmırsınız?”, – deyə Aydın Əliyev yazıb.

O, Radioloqlar Cəmiyyətini gənc həkimlər üçün daha əlçatan şərait yaratmağa çağırıb və bildirib ki, yüksək ödənişlər istedadlı kadrların inkişafına mane olur.(tribunainfo.az)

Gülşən Rəsul