Yenixeberorg.az: O, sosial şəbəkədəki paylaşımında Bakı–Qazax magistral yolunun Hacıqabul istiqamətində yerləşən “Qədir Xum” restoranında qida məhsullarının keyfiyyəti ilə bağlı narazılığını ifadə edib.

Elman Mustafazadənin sözlərinə görə, o, xaricdə yaşayan azərbaycanlı dostları ilə birlikdə dəfələrlə həmin restoranda yemək yeyib. Elman Mustafazadə bildirib ki, hər dəfə qrup üzvləri mədə-bağırsaq problemləri ilə üzləşib, hətta bəziləri bir neçə gün yataq rejimində qalmalı olub.

O bildirib ki, sonradan restoran əməkdaşları ilə söhbət zamanı yeməklərin hazırlanmasında istifadə olunan yağlarla bağlı fərqli məlumat əldə ediblər. Mustafazadənin iddiasına görə, əməkdaşlar kərə yağı əvəzinə palma və digər ucuz yağlardan istifadə edildiyini bildiriblər. O, restoranın mətbəxində zeytun yağının da olmadığını qeyd edib.

Qarabağ qazisi hesab edir ki, bu cür hallar istehlakçıların aldadılması ilə yanaşı, qida təhlükəsizliyi baxımından da ciddi narahatlıq doğurur.

Elman Mustafazadə Qarabağa səfər edən qürbətdəki soydaşlarına imkan daxilində Bərdə, Gəncə, Şuşa, Xankəndi və Laçında yemək yeməyi tövsiyə edib.

O, həmçinin restoranların qarşısında “Halal xörəklər” yazısının olmasının həmin müəssisədə təqdim edilən yeməklərin keyfiyyətinə və təhlükəsizliyinə zəmanət vermədiyini vurğulayıb. Vətəndaşları sifariş etdikləri yeməklərin hansı məhsullardan və necə hazırlandığı ilə maraqlanmağa çağırıb.

“Halal sözü reklam lövhəsinə yazılmaqla halal olmur. Halallıq hər şeydən əvvəl vicdan məsələsidir”, – deyə Elman Mustafazadə bildirib.